Dende va tiempu y debío a l’amistá de fai años con Manuel Paz, tuvi siguiendo dende l’entamu’l so perinteresante proyeutu “Los Canteros del Sonido”. Trátase de la reproducción d’instrumentos qu’apaecen nos capiteles y caneciellos del románicu asturianu y, con esi enfotu, dellos luthiers recrearon y construyeron seis instrumentos: una corna, de Ceares, Xixón; una vihuela y un panderu cuadráu de La Lloraza, Villaviciosa; una rota d’Arllós, Llanera, y otra d’Uxo, Mieres; una gaita de Mazaneda, Gozón, y una cítola medieval. Una esposición nel muséu del Parque Arqueolóxicu Natural de la Campa Torres de Xixón espeya perbién el trabayu desendolcáu hasta agora, magar qu’esto nun seya’l final del proyeutu.

La esposición, que nun principiu diba finar el 27 de setiembre pasáu, énte l’ésitu d’asistencia —4.000 visitantes ente xunu y setiembre— allargóse dos meses más hasta’l 24 payares y, polo tanto, tais a tiempo de facer una visita.